曼聯周四熱身賽喺先失一球下逼和墨西哥球隊CF阿美利加,陣中新星鍾達希(Tahith Chong)表現就非常搶眼,仲交出一次間接助攻。18歲嘅鍾達希喺加勒比海南部嘅古拉索出生,由於鍾達希嘅姓氏「Chong」好似華人姓氏,所以唔少內地網媒就指,鍾達希嘅媽媽係第三代華人咁話,不過呢個講法始終冇得到當事人證實。但可以肯定嘅係,呢位荷蘭U19成員今場表現唔錯,相信嚟緊喺曼聯仲有大把機會,隨時成為下一個連格或者拉舒福特!