阿仙奴主帥艾馬利新官上任，即為兵工廠帶嚟好大嘅人事變動，例如喺教練團隊上，列文等一眾雲格時期嘅老臣子都無得留低，前朝教練團只有保特一人能夠繼續留任。根據英國傳媒報道，阿仙奴近日聘用咗一位叫做Mikhail Zhilkin嘅俄羅斯人做球隊嘅數據科學家，原來呢位仁兄大有來頭，因為佢正正係當年瘋魔全球手機遊戲《Candy Crush》嘅其中一位核心開發成員。
搞數據科學減球員受傷
嚟自俄羅斯嘅Mikhail Zhilkin係球壇初哥，報道指佢嚟緊會同兵工廠嘅科學團隊緊密合作，試圖將佢喺數據科學範疇方面嘅專長，應用喺阿仙奴球員身上，希望佢能夠令球員能夠發揮到最好嘅表現，同時減低受傷嘅風險。
今年阿仙奴喺球員嘅人事上都有大變動，唔少喺球隊有一定年資嘅球員，包括「卡叔」辛迪卡索拉同「太子」韋舒亞都喺今夏離開咗。其中韋舒亞效力阿仙奴長達17年，屬於球隊嘅「元老」之一。現年26歲嘅中場韋舒亞，今個夏天以自由身形式轉投同為倫敦球會嘅槌仔幫韋斯咸。而近日呢位英格蘭中場接受訪問時就話，佢對新上任嘅領隊艾馬利充滿尊重並無怨言，亦感謝對方誠實咁話佢知兵工廠已經唔再需要佢。
簽五位中後場新兵夠皮
阿仙奴由夏天轉會市場開始至今，已簽入五位新兵（見附表），包括德國門將賓特尼奴、兩名後衞柏柏斯達夫普路斯同列治史迪拿；兩名中場盧卡斯托拉拿同小將古安杜斯，兵源都係集中喺中後場。對於兵工廠今夏喺轉會市場嘅動作，艾馬利就直言佢對手上擁有嘅球員感到非常滿意，認為組軍工作已經完成：「呢一刻嚟講，我認為球隊嘅陣容係相當完整，我只會喺有重大機會出現時，先會多簽一至兩名球員。一間大球會永遠唔會拒絕簽新人，但球會喺今個轉會市場上做得好好，我亦都非常開心。」
