娥特過去無論警隊發生乜事，都硬撐差人的「藍絲」作風，唔少人都十分清楚。噚日發展局局長黃偉綸現身書展，同青年分享閱讀心得時，就無懼「政治不正確」，講返啲人話。
大讚東野圭吾寫實
話說噚日黃偉綸同青年分享愛書時，大談日本推理小說作家東野圭吾，透露自己好鍾意呢個日本「社會派」作家，將好多社會問題，特別係弱勢社群面對的困難寫入小說，「佢（東野圭吾）亦都有句嘢我好鍾意，就係罪犯未必係壞人，犯罪亦都好多客觀的原因，都好多值得同情的地方，同樣警察都唔係一定個個好人嚟，我覺得其實好現實，同埋反映到好多嘢」。八方相信呢番說話，唔係個個政府官員敢講。
黃偉綸其後又用東野圭吾的生平鼓勵年輕人，話東野圭吾唔係贏在起跑線，成為作家之路亦唔係一帆風順，但佢一直堅持理想無放棄寫作，終於去到40歲寫完名作《秘密》後，終於有大突破。
黃偉綸其後同青年交流時，被問到覺得現時香港青年係點時，黃就話覺得香港年輕人係善良嘅，「即使對政府好唔滿意，但都係善良嘅」，認為未來香港社會係屬於年輕人，所以發展局思考香港未來需要乜時，希望可以多啲聽年輕人意見一齊去做喎。