八方噚日報道九龍城啟德豪宅區，明年區選將有個新選區，有個左派女將打算落嚟大展拳腳，向明年嘅新議席進軍，建制派報告最新戰況，話原來呢個女人已經過晒氣，半年前已經執咗包袱離開咗。啟德呢個滿佈豪宅嘅最新戲碼，如今已變成自由黨張景勛大戰經民聯龐朝輝，雙方點都唔肯退，各自都話啟德係佢哋嘅地盤。
經民聯：點解要讓畀自由黨
八方聽自由黨中人講，呢個區已經屬於自由黨，話經民聯想講數，但經民聯中人就話，「點解我哋要讓畀自由黨？呢個區會有德朗邨（公屋）幾棟樓，我哋點解要畀咗佢？雖然自由黨代表中產，龐朝輝都係醫生！」雙方各自唔讓路，不如聽吓兩位戰將有咩講。
拔萃男書院畢業、身兼公司董事嘅自由黨張景勛就話，自己已經喺該區成立咗個啟德社區關注組，仲係關注組嘅召集人，話已喺區內有辦公室，希望繼續服務該區。張景勛嘅facebook見佢替新樓啟德1號為街坊免費提供甲醛驗測服務，又有佢為區內長者拉紙皮嘅相，相當落力。
曾經係自由黨、如今已加入經民聯嘅眼科醫生龐朝輝，喺facebook見佢於區內派糭、同梁美芬了解該區交通設施嚴重滯後嘅問題，又喺區內舉辦眼睛護理講座，同樣相當勤力。龐朝輝同八方講，經民聯係「好想要啟德呢個位」，現在由佢喺該區做地區工作，絕對未有放棄，「上個星期我先至落完區」。兩個建制派相爭，民主派係咪應該諗吓派人落去呢？
李八方