晨早起床，清新開朗，呢位九巴車長認真識嘆，企喺車上打開車門，邊享受陽光，邊嘆咖啡，咦！小記望真啲，佢隻右手竟然放咗喺下體，把玩露出嘅小弟弟，疑似自瀆。
女途人嚇到走人
話說呢張相係一位女網民喺星期二（17日）朝早6點幾影低，佢當時途經慈雲山蒲崗村道，見到着住九巴制服嘅車長，企咗喺九巴下層嘅落客出口，面向行人路草叢，左手拎住罐咖啡，右手就喺下體有所動作。女網民話，上星期同一時間地點，已經見到呢位車長咁樣做，其間仲有途人經過，自己當時嚇到走人，今次再見到呢個情況，即刻影低，並且報警。
警方經初步調查後，噚日下晝喺黃大仙拘捕66歲姓趙男子，涉嫌猥褻露體，現正被扣留調查。案件交由黃大仙警區刑事調查隊第5隊跟進。九巴回應就話，案件已進入司法程序，不便評論，強調員工必須奉公守法，會配合警方調查。