利物浦即將以6,680萬鎊（約7.5億港元）天價買入羅馬龍門艾利臣比加，加上車路士未必留得住泰拔高圖爾斯，所以歐洲幾支列強嘅龍門好有機會大執位，據講車仔想向AC米蘭挖角「新保方」基安盧基當拿隆馬，或者想搵番施治回巢。
因為每隊得一個正選位，而且後備唔容易有機會出場，所以龍門一轉會，就好容易引發大執位，25歲嘅巴西正選門將艾利臣，禮拜三已經確認會以6,680萬鎊天價離開羅馬去紅軍，據講佢喺周四已經去到利物浦準備體測，似乎一切只係差官方宣佈。英媒立即將艾利臣起底，佢原來喺場外好低調，仲係愛護家庭嘅好好先生，成名前踢國際體育會嗰陣，已經同老婆娜塔莉撻着，娜塔莉原來仲係醫生嚟，不過為咗艾利臣，一早已經陪佢離開巴西，所以艾利臣都好感激老婆。
高圖爾斯去皇馬
因為門將泰拔高圖爾斯可能轉投皇家馬德里，車仔原本都有傳想搵艾利臣，家陣希望落空，據意媒爆料話車仔轉斟AC米蘭嘅19歲門將當拿隆馬。不過車路士除咗對當拿隆馬有興趣，亦有可能喺阿仙奴簽番舊將施治，或者向李斯特城門將卡斯柏舒米高埋手。三個人當中，施治當然最有機會成事啦，皆因阿仙奴簽完賓特尼奴之後，施治隨時又被貶後備，返去車仔都唔奇。
張伯倫下季報銷
講番紅軍吖，計埋艾利臣的話，紅軍已經有四個新兵（見附表），夾埋用咗成1.7億鎊（約17.5億港元），最貴嘅係艾利臣，其次就係上年已經確定會簽嘅中場拿比基達，要成5,275萬鎊，而且紅軍一個球員都未賣過，相當豪氣。不過，領隊高路普禮拜三就證實，上季喺歐聯四強對羅馬重創嘅24歲中場阿歷士張伯倫，因為右膝傷咗成三條韌帶，所以18/19球季預計全季報銷，踢到幾場已經係超額完成咁話。