「如果真係可以普選特首，諗下嗰時會有乜事發生？」香港普選未見時間表、也不見路線圖，前AO楊立門拋下的一個問號，答案可以天馬行空。他以未知的一人一票選特首為背景，創作長篇懸疑小說《獨舞黃昏》。涉及謀殺案的故事情節純屬虛構，但一些人物角色設定，歡迎大家對號入座，如民主派候選人「孔志憲」是大律師兼立法會代表，是否有點，熟口熟面？
退休前官至常秘嘅楊立門，2016年出版短篇小說《去．留》後，今年再出新書，「估你唔到」文青味濃的他也愛奇情，「自細已經好鍾意睇推理小說嘞，好似福爾摩斯；中學就睇Agatha Christie（阿嘉莎．克莉絲蒂），佢啲書幾乎本本都睇過，全部都歷久常新，《東方快車謀殺案》最近都拍成電影啦。」
初試啼聲的短篇小說反應不俗，連林煥光都讚他「用右腦寫人心深處更出色。」拿定主意自我挑戰，踏步循懸疑小說發展，以特首普選為大綱，除沒框框限制，也想點出尖銳的政壇官場眾生相，「因為未有（發生），所以會自由啲表達想講嘅嘢；嘩，如果講2017年特首普選，咁我好多嘢都唔講得㗎嘞。」
取材政壇真實人物
任何選舉大抵都是兩陣對壘，以九個月完成的《獨舞黃昏》，男一與男二分別是建制派與民主派的候選人，競選其間怪事連場。不想劇透，楊立門對情節暫時封口，但得知男一是問責局長，已經令人無限聯想。楊不諱言一些角色取材自時下政壇真實人物，描劃的政圈也是自己為官多年熟悉的世界，讀者似曾相識也難怪。或是一份情意結，男一的政治助理是高級AO，「故事會特別點出AO都係一個人嚟㗎喎，唔只係做嘢機器，工作以外係會有生活㗎囉……」好像有點意在言外。
問到創作懸疑小說的關鍵，他說必須留有伏線，要在「意料之外 情理之中」，「要解釋畀人聽，點解可以咁樣發生？唔可以收唔到科！」顯然《那夜凌晨 我坐上旺角開往大埔的紅van》未能滿足他，「越睇越唔對路，就咁做完咗？懸疑嘅意思係，你最後要揭盅㗎喎，諗怪事好易，但點解有理由咁樣發生就好難咯。」
■記者許偉賢