呢日咳個不停，晚上睡眠不足，身體疲累，早上返到寫字樓後，因之前說話太多，更加咳得厲害，想起中午有飯局，到中總俱樂部吃午飯嘅，點好呢？諗諗吓，都係決定唔去咯，以免一路食一路咳，令各老友掃興，況且到時必定有炸子雞之類，忌食，於是送短訊畀做東嘅賓架N，講句鎖你鎖你。
之後吃成藥，吃完更加眼瞓，事關當日凌晨二時睇世界盃四強大戰，克羅地亞對英格蘭，睇完真係好攰，英格蘭上半場佔盡上風，但明顯見到球員漸露疲態，領先一比零之後，反而怕輸，唔夠放，簡尼在門前射門，空晒位，在熱刺就十次入九次，哎吔，呢次竟然射門無力，被克羅地亞門將擋出，左丁山當時心中暗叫不妙，放生對方，後患無窮也，果然到咗下半場，克羅地亞拚命反攻，英軍開始有啲慌失失，卒之失守，打和一比一。加時仲輸埋㖭，點解英格蘭球員嘅拼搏精神與體力反而輸畀早前連踢兩場加時嘅克羅地亞呢？睇嚟都係生於憂患，死於安樂嘅道理，克羅地亞幾經辛苦，脫離南斯拉夫獨立，曾備受塞爾維亞人壓迫，有戰亂之痛，所以球員愛國心特強，拚死為國爭光，而英格蘭球員少年不知愁滋味，血拼到最後，就係差少少囉。但克羅地亞對住法國，冇理由贏波嘅箒，法國隊多唞一日，好着數。（補按：英格蘭後來再鬥比利時爭季軍，輸零比二，實力見晒底，攻不銳，守不穩，以後仍會繼續輸畀比利時。法國以四比二擊敗克羅地亞奪得世界盃，一如所料，但想唔到贏得幾辛苦箒！）
因為身體疲乏，雙眼一合埋，就坐着瞓了個多小時，醒來已是兩時後，於是一個人出街吃飯，睇見枱上有蔡瀾送來之越南河粉贈券，心念一動，贈券就唔攞出街咯，直情走去威靈頓街幫襯，諗住繁忙時間已過，實有位啩？誰知不然，兩點半，門口仍然大排長龍，都唔知幾時先至入到去，於是索性去斜對面嘅鏞記，到地下雅座吃雲吞麵，甘老闆公子好勤力，仍然在地下巡視，走過嚟打招呼，問點解食得咁遲。話畀佢聽，蔡瀾嗰邊無位，先至走過嚟，甘公子笑曰：「前幾日仲誇張呀，晚上人龍更長，排隊去到砵典乍街樓梯口！我都想去試試！」鏞記與蔡瀾非常熟絡，經理威哥走過嚟講：「駛唔駛同你打個電話畀蔡-san秘書，安排一下？」千祈唔好，想畀排隊食客鬧咩，於是安坐鏞記地下，吃雲吞麵、肉丸粥及牛肉燒賣，非常正斗箒，有不少內地遊客慕名而來，下午兩點後大多數中環中菜食肆已經開始小休，鏞記地下繼續有好嘢食！