前阿仙奴領隊雲格自從上月離任以後，仍不時喺公開場合露面，佢最近就接受法國RTL電台訪問，講番過去嘅執教歲月，直指自己執教生涯中最大嘅錯誤，就係留喺同一間球會太長時間。即係話執教兵工廠22年係錯嘅？
雲格喺訪問中提到：「我係嗰啲鍾意周圍走嘅人，但同時鍾意尋求挑戰，而有時會因為深陷挑戰而不能自拔。」雲格同時指，因佢深陷阿仙奴呢個挑戰太耐，令佢犧牲咗好多：「回望過去，我好遺憾因為呢份工作而放棄咗唔少嘢。我傷害咗好多人，亦因此犧牲咗家人同朋友。」喺專訪中，雲格亦有提到亨利同韋拉兩位高足，話佢兩人都具備成為好教練嘅天份同知識。但係對於佢哋能夠為呢份工作犧牲幾多，雲格就抱有懷疑。另外，雲格喺訪問中亦有透露自己有多次機會執教法國國家隊，但係佢熱愛執教球會多過國家隊。不過，現時有幾支國家隊都有接觸佢，佢會好好考慮。