休息咗接近兩個月嘅日職喺周三重開，而兩位前西班牙國腳恩尼斯達同埋費蘭度托利斯近日亦都已經去到日本同球隊報到，不過大家要睇呢兩位球星喺日職比賽亮相，就仲要等多幾日喇，球迷睇住《足球小將》化嘅費托先。
地標戰下周鬥維加泰
喺上星期日到埗嘅費托周一已經開始參與鳥棲砂岩嘅操練，不過球隊周三作客湘南比馬嘅比賽佢就冇份踢喇，事關今季日職第二輪球員註冊喺今個星期五先至開始，所以費托最快都要喺下星期日主場對仙台維加泰嘅比賽先有機會地標上陣。不過費托日前接受訪問嗰陣就話自己已經準備好落場咁話喎：「西班牙球季結束之後，我一直都有練波，所以我嘅狀態唔成問題。」
除咗鳥棲同費托嘅球迷之外，仲有一個人都一樣好期待「王子」可以盡快落場嘅，佢就係經典足球漫畫《足球小將》嘅作者高橋陽一喇，高橋老師近日就去咗同費托見面，仲送咗幅親筆畫畀對方㖭，唔知費托又有冇睇開《足球小將》呢？高橋老師仲話，希望費托可以將日本嘅足球熱潮延續落去：「我好期待托利斯喺鳥棲砂岩嘅表現，希望佢可以將世界盃所帶起嘅足球熱潮保持落去，令日職變得更加熱鬧。」
小白抵日簽名冇托手踭
除咗費托之外，今季由巴塞隆拿轉投神戶勝利船嘅恩尼斯達亦都喺星期三抵達日本喇，近300位球迷喺關西國際機場迎接呢位巨星登陸，小白亦都非常親民，喺機場用咗10分鐘幫球迷簽名，佢仲話希望盡快喺日本球迷面前獻技㖭：「雖然搭咗好長途嘅飛機，不過我嘅狀態唔錯，希望可以趁呢幾日盡快調整好比賽狀態，我嘅目標係今個星期日可以落場比賽。」
恩尼斯達同費托下星期日就有機會踢地標戰，不過大家要睇呢兩位球星同場較量就可能要等多幾個月喇，雖然神戶勝利船同鳥棲砂岩會喺8月22日嘅天皇盃第四圈互撼，不過預計到時兩隊都會收起主力，而聯賽嘅對碰就要等到11月10日嘅第32輪聯賽喇。
至於周三嘅日職賽事，榜首嘅廣島三箭就繼續大勇，喺大部份時間多打一人嘅情況下憑首席射手安達臣奧利華拉梅開二度，再加上工藤壯人同鄧達各入一球，主場以4:0大炒大阪飛腳，賽後繼續領先第二位嘅FC東京九分。