運氣真係話嚟就嚟？噚晚六合彩暑期金多寶彩金超過8千萬呀，大家聽到咁梗係爭住去買啦，點知就出現咗阻滯。好多市民喺放lunch時間去買，投注站電腦竟然down機，有巿民排隊排咗一個鐘先買到彩票。結果開彩係頭獎十元一注獨中，派彩$82,939,250，係歷年暑期金多寶最高派彩。做唔成幸運兒就唯有下次再嚟過啦，但市民就希望馬會搞好伺服器系統囉。
葵涌投注站排成粒鐘
未開彩前大把市民都諗住碰吓運氣，好似曹小姐咁，佢噚日大約12點去到葵涌石籬投注站，點知排咗一陣隊投注站就有廣播話系統故障，等咗一個鐘先買到六合彩。佢覺得馬會近排多咗系統故障，認為馬會要upgrade吓個系統。
另一位黃先生喺尖沙嘴返工，同樣噚日趁12點半食晏時間去柯士甸道投注站買六合彩，亦係馬會電腦壞咗。馬會話最後伺服器經修復，大約廿幾分鐘後回復正常。鬼咩，其實今年3月尾馬會嘅場外投注站已經試過一連兩日有問題，要臨時取消當晚嘅六合彩攪珠順延一日。第二日輪到跑馬，又有57間場外投注站因為壞電腦令到投注服務受影響兩個鐘。
