繼早前開記招宣佈同民協和平分手後，馮檢基噚日又見傳媒，主要係講述新書《馮檢基那一條窄巷》。佢自爆今次用咗「6位數字（即至少10萬）」出書，若1,500本全部售罄「就可以回本」，但事實係佢之前出書4次，每次只印300本都蝕錢收場。點解多次蝕錢仲堅持出新書？佢話覺得2016年香港民主和民生情況極差，加上敗陣立法會選舉，希望可以做總結，亦為歷史做紀錄。當中唔少章節爆3.11九西初選秘聞，阿基仲喺書中鬧爆朱凱廸㖭呀！
阿基當中提及3.11初選細節，民主動力鄭宇碩一邊話支持佢出戰九西補選，一邊問佢會唔會退選，令佢大感不滿。同時又講力撐姚松炎參選嘅朱凱廸曾指有3個原則好重要，包括民主派一定要贏，但若阿基任Plan B，佢周邊嘅人都會反對，表明唔會投票撐馮甚至改投對手。阿基引述朱凱廸話：「初選姚松炎贏你咁多，你咁少票，你贏唔到啦」，仲話阿基承接唔到反DQ氣氛，豪言「我哋（民主派）可以贏4席（補選）」，「而你打中場，我哋要前鋒」。
鬧朱凱廸不斷講大話
阿基話自己宣佈退出初選前，民主派包括朱凱廸在內曾自行開會制訂Plan B名單，包括李卓人、余若薇、李柱銘、梁家傑、吳靄儀、戴耀廷等，當中梁家傑指若然佢肯退，自己就可以做Plan B，阿基喺書中話接受唔到。令佢最耿耿於懷係朱凱廸事後「不斷講大話」，「明明暗中策劃搞Plan B，但是敢做不敢認，賴得就賴」。
問及披露九西初選細節會唔會擔心影響同民主派關係？阿基話書中所寫都係所見所聞，「唔民主嘅嘢，點解唔寫出嚟？」指唔少內容早已「出晒街」，自己只係將資料集結成書，同時想就3.11補選「劃個句號，不再討論」。對於阿基嘅批評，朱凱廸回覆話唔回應嘞，「我要講嘅已經講晒」。
李八方