窮到燶出身的惠英紅不怕捱苦，她非常孝順父母，她自幼已知道要爭氣，讓父母過好生活，無奈父親在她19歲時被癌魔帶走，母親十多年前也患上認知障礙症，每況愈下，前年也離開。這一集，紅姐分享了與父母之間難忘事。
「阿爸係滿州正黃旗人，細個屋企有錢，時勢亂，家人將佢送出嚟，錢換成金，幾十個工人陪佢帶古董同十幾箱金嚟港，最初太子道，成條街好多樓，因為太子爺關係，工人一離開莊園就呃佢太子爺，阿爸又賭吓，結果輸吓一間，輸到差唔多，香港已立立亂，因為阿爸輸咗身家，我哋自幼家規係唔准賭，爸爸落難去咗做工廠啤工工人。
「一次工業意外，爸爸俾啤針爆射爆右眼，左眼又遺傳弱視，視力受損失業，工都冇得返。爸爸身體唔好，佢係『病壞』，佢又跌傷過，做唔到嘢，留喺屋企煮飯同接送放學，阿媽就負帶我同妹妹出灣仔賣嘢。」
「如果冇船期嚟，冇水兵嚟，我哋唔使開工，爸爸會帶我哋去水塘玩，又會教我寫字。佢會親手廢物利用，教我哋畫箭靶，執爛遮整弓箭，又或者剪爛褲腳整沙包。佢其實本身好有學識，可惜生不逢時，佢讀好多書，學問好，佢係公子，細粒孱弱不堪，記得我哋調景嶺木屋都係爸爸自己搭，生咗細佬妹妹，爸爸自己買木條搭碌架床，又搭廚房枱，佢乜都識，又識織冷衫，佢手字寫得好靚。爸爸係我見過最有風度嘅人，溫文有禮，全家瞓樓梯底，我哋拎餸尾食，我見過爸爸喊，環境打倒佢意志。」
「爸爸臨死前迴光反照，好似冇事咁，我記得佢同我講『你放膽做，想做乜嘢都去做，你做任何嘢都啱』。呢句好緊要，所以我成日話畀自己聽，我冇做錯任何嘢。灣仔賣嘢時，我係大家姐，有時賣晒嘢會偷懶，媽咪追我九條街，飛我拖鞋，有次我講咗粗口鬧阿媽，阿媽激到暈，佢攞膠水喉真打我，膠水喉打落去會皮開肉裂。爸爸肉痛，用個身擋同我檔，我爸真係好錫我。」
「爸爸離開時，唯一得我夠膽去攬住佢。生離死別，每個人一定有，對我嚟講唔會好大，最傷感係我哋生活環境好少少，佢哋享唔到福，我哋喺街邊賣嘢日子，佢好健康，我拍戲做主角，我憑《長輩》拎影后，我將獎座放喺神枱，祖先嗰位。」
「我媽都好錫我，以前拍戲見我周身傷，佢會幫我捽跌打酒，一路捽一路喊，夜晚我幾夜收，佢都會煮定宵夜，佢成日講『我係為你好』。所以拍《幸運是我》時，呢句對白，我好大感觸，媽咪又喺段時間走咗，我好入心入肺。」
「媽咪一生辛苦，爸爸都係，我哋瞓街時，佢好健康，我拍戲做主角上番嚟，佢哋享唔到，我媽死時，都係唯一得我攬住佢，同佢唸經，我唔覺得係乜嘢一件事。佢係一個好傳統嘅媽咪，佢覺講出嚟好醜，到斷氣前都未讚我一句。」
「我媽咪好慳，佢啲錢收喺床下底，佢唔信銀行，我第一次買樓，佢同我反枱嗌大交，佢驚到啲錢冇晒，佢係咁嘅人，我要接受。我成日話我媽又醜樣，有得驗IQ，爸爸130，佢得80，我笑阿爸可憐先要佢，媽咪就笑，佢就係咁樣嘅人，冇得頂。」
「我童年喺灣仔賣嘢，有次唔好彩被拉返差館拘留，以前見細路可憐，畀10蚊可以贖，嗰次唔放，第一日扣完，兩日都唔放。媽咪大鬧差館，要上法庭，我媽咪係山東婆，嘈嘈吓就打交，仲搶人支槍，唔知點俾警察㩒住。我判咗入住保良局3個月，媽媽咪就日日大鬧保良局，我接受評估，法官見媽咪錫我，畀我返屋企母女團聚。」
「保良局每周有一日響大鐘，有個大鐵閘，30幾個等住畀人領養小朋友會衝出去搶頭位，有啲夫婦嚟揀小朋友，局中小朋友好渴望揀中自己，佢哋恨有個家庭，我見過，所以領養概念畀我好深。」紅姐好想畀啲愛待領養小朋友，佢話：「我三、四十歲時有個念頭，如果我結婚，唔會生小朋友，我想去領養。可能我自己行嘅路好辛苦，越大越知冇返過學係好慘，唔想住保良局小朋友行番自己舊路，就算結婚都會領養。」
撰文：比華利
攝影：林德雄
攝錄：葉君海
髮型：James Lee＠HAiR
化妝：littlewhite
場地：金公館