58歲的惠英紅憑電影《長輩》奪得第一屆香港電影金像獎影后，從此星途燦爛，去年更憑電影《血觀音》在台灣第54屆金馬獎頒獎典禮中登上影后，紅姐去年大豐收，一年內更囊括多個電影頒獎禮，總共掃走6個影后獎項，認真威水。
誰說英雄莫問出處，紅姐從不掩飾街童出身，10年街童生涯，有苦有樂，她自爆最愛去戲院八卦，「灣仔以前有間東城戲院，播映黃梅調，有林黛、李菁啲戲，我『吞pop』去戲院，嗰度唔係我地頭，我唔係入去睇戲，我睇大堂啲相，我未知呢個世界上有錢人係點，有次去到撞啱有首映，好多人喺大堂，好多人影相，我見到主角好靚，心諗呢個就係有錢人，當時訂下目標，一要做到佢咁，係我理想。」
「我貪玩拎媽咪啲褲扮水袖跳舞，好想學海報相中人，13歲後就唔想再喺灣仔賣嘢，嗰時家姐已喺中式夜總會跳舞，仲去拍戲，有份拍許冠文主演嘅《大軍閥》，我覺得原來跳舞可以做明星。14歲時，我靜雞雞去美麗華夜總會應徵跳舞，再同媽咪講數唔肯出灣仔，我喺夜總會跳咗兩年，有一次有人嚟夜總會後台，佢話張徹導演開《射雕英雄傳》，揀咗我同兩個師姐，我梗係想去，一直希望搵踏腳石做明星。」
紅姐回憶試鏡情況：「午馬係副導演，有車嚟夜總會接我哋去邵氏舊片場試鏡，我冇通知屋企人，佢哋打嚟後台通知，兩個師姐OK咗，我話要試多次，我個心跌咗落地，點解佢哋一次過pass，我就要第二次試鏡。我再去時有劇本，我試黃蓉戲，我唔知邊個係黃蓉，副導演畀張紙教我，我照做，仲話要我俏皮啲，嗰日傅聲嚟做郭靖同我試戲，後來我知傅聲係邊個，佢好靚仔。」
第二次試鏡後兩天，紅姐接到電話，張徹點名讚佢，將紅姐由配角躍升到第二女主角，「我當然開心到不得了，只搵我拍一套，唔使簽約。拍完邵氏覺得我好好，要同我簽長約，我當年未夠18歲，媽咪問幾多錢，當時爸爸有cancer，我跳舞可以搵到2千幾蚊，但片酬得500幾，媽咪翻晒天，唔肯同我簽，佢睇錢比較重要，冇睇到將來。我搵唔一齊住、做女武師嘅二家姐同我簽，電影公司啲人問，我就話爸媽死晒，就係咁入咗邵氏。」紅姐如是者簽約邵氏旗下，媽咪反對，紅姐就同母親講數：「我話會賺5萬蚊畀佢，我當時概念，唔知5萬有幾多，未接觸到，我話拍戲一定紅，一定搵好多錢。」
紅姐竄紅感恩身邊有伯樂，首要多謝張徹：「跳舞嗰度，個個女仔都靚，30幾個女仔，佢揀咗我，畀咗我機會，報紙寫佢『慧眼識英紅』，話佢咁多個揀到我，咁啱我叫惠英紅。」兩人及後上契，紅姐是張徹圈中唯一契女。李翰祥在紅姐上也幫助她不少，70年代，李翰祥拍大量風月片，其後改拍喜劇片，77年為邵氏拍了電影《乾隆下江南》，這是乾隆系列的首部作品，故事取材於乾隆下江南的野史和民間傳奇，他看中紅姐身手：「乾隆王下江南，身邊梗有一個好打嘅，我就係嗰個女扮男裝，導演見《乾隆下江南》賣錢，跟住有一系列不斷拍咁去，如是我都拍咗兩、三套。」
撰文：比華利
攝影：林德雄
攝錄：葉君海
髮型：James Lee＠HAiR
化妝：littlewhite
場地：金公館