【杏林人物】
學醫，其實也是學做人，這是中文大學醫學院院長陳家亮行醫30年的得着。能成為醫生，大多成績優異，平步青雲，卻因自視甚高，未曾遭遇挫折，結果不能體諒病人，缺乏同理心。他說，醫病容易，醫人困難。要做一個好醫生，最重要懂得易地而處，了解病人需要，他勸喻年輕醫生要少點浮躁，多花半分鐘細心聆聽病人心底話。
記者：嚴敏慧
攝影︰彭志行、方國成
"醫生同病人間，醫生同社會間矛盾、衝突，我覺得好可惜。"
「學做人其實好困難。」陳家亮直截了當點出現時不少醫生的盲點。學業成績好、能力高，自小平步清雲，「認為自己好叻」，不明白身邊人感受，亦未能靠自己能力解決問題，「因為咁引致好多不必要誤會，醫生同病人間，醫生同社會間矛盾、衝突，我覺得好可惜。」
出身基層，靠一雙手努力做到今日醫學院院長位置，陳家亮坦言也曾驕傲自負、不能體恤別人，「我靠自己努力克服好多困難，我當日咁辛苦，甚至比你條件更差，我都成功，點解你唔得？點解你咁渣？點解你咁軟弱？」身處醫生團隊，他發現這心態會影響團隊合作，實在要改變。
要能易地而處，還要了解病人真實需要。陳家亮不止一次撰文提及，現時醫生只會機械式治療，問症安排檢查治療一式一樣，卻連最基本的落手觸診也不做，可能與公院病症多及太忙有關，但他始終認為行醫心態更勝一切。
他以腸胃科診所為例，每日數十名病人全為肚痛不舒服，最終都要安排照大腸鏡，「第一個病人入來，其實係擔心自己有大腸癌，照咗可以解決問題，佢會好開心，如釋重負；第二個病人入嚟，問多佢兩句，可能之前五年已經喺唔同醫生照過幾次大腸，最重要唔係安排佢照第六次、第七次，而係要了解佢心內擔心啲咩。」
"年紀大嗰啲，你唔聽我講你就睇第二個，後生嗰啲就心浮氣躁。"
的確，公院門診只有3、5分鐘見病人，但要做到有質量醫人，而非單純醫病，醫生其實只需靜心聆聽病人半分鐘，「醫生有幾何可以靜靜地聽人講半分鐘，而唔打斷佢話柄？可能病人講到唔夠第十秒，就會話『我明你想要咩㗎啦』、『得啦得啦，你想要隻咩藥呀嘛，我會畀你㗎啦』。」他認為，聆聽30秒不是難事，只不過前線醫生太忙，心情煩躁，沒有心情去做。「聽病人講，未必可解決到問題，但病人感激會好深。」
陳家亮發現，出現上述問題的醫生，不同資歷都有，「年紀大嗰啲，自細習慣咗，你（病人）一定要聽我講，我講嗰啲就係金科玉律，你唔聽我講你就睇第二個（醫生）。後生嗰啲就因為心浮氣躁，工作量大好忙，門診又on call 36小時，加上病人有時講嘢有啲浮躁，聽起來哽耳，有反應唔出奇。」
資深醫生已難改變，陳家亮惟有寄望年輕一輩，故他堅持將身教帶入醫學院，教授教學不能只停留理論，亦要帶學生去真實門診、病房環境，讓他們看到醫生應如何對待病人，以身作則、潛而默化，由醫學生開始培養。