打女惠英紅，拍戲受傷，有苦自己知。
79年，劉家良開拍電影《爛頭何》，紅姐當時未擔正，被派演妓女翠紅，紅姐說：「戲中叫小紅，所以我唔鍾意人哋叫我『小紅』，最初戲中演妓女，喺主角面前打，主角打咗幾個鏡頭，失蹤唔拍，導演好嬲停機，有人發現我打得幾好，叫我試吓，我根本喺現場，只係佢（劉家良）未望到我，跟住佢哋攞主角套衫畀我換咗去拍，叫我拍踢高腳，我有跳舞底，好簡單。」紅姐一夜大茄升呢主角，時來運到。
劉家良再開拍電影《長輩》，點名紅姐孭飛，可惜該片開工約10多天，她不幸盲腸炎，有一場戲更不慎由高處撻落地：「我爆咗盲腸，變腹膜炎，嗰日夜班拍咗一半，我暈咗送去醫院，一個鐘手術做咗四個幾鐘，我變成腹膜炎，抽晒啲嘢出嚟。手術後我要留院，我未拆線，堅持要出院。」紅姐怕被換角，「第一次做主角，係我轉捩點，我嗰時18、19歲，醫生講要攤床十日、八日，劇組會換角，唔等我，搭咗景，停一日廠影響好大，我手術後5、6日，攣住出院去開工，個身挺唔直，劉師父叫我休息，我話冇嘢，佢轉拍文戲，拍咗10幾日，等我順番先拍打戲。我鬥心到咁，我明白有啲嘢可一不可再，自己唔可以咁驕生慣養，機會冇咗就冇咗。」結果，《長輩》叫好叫座，更讓她在首屆金像獎摘下影后，也是金像獎唯一一位憑武打片榮獲影后殊榮的演員。
人紅自然升價，紅姐跟邵氏再傾新合約：「我話5萬啦，其實我可以講10萬都得，呢件事擺咗喺我心度好耐，我知其實可以拎到10萬，但口快快講咗5萬，真係蠢。」由紅姐出身窮，對於金錢沒太大概念，邵氏於是僅用5萬就綁着影后。
當90年代興文藝片，紅姐演藝路不順，轉型無望：「我求老闆畀我轉，佢唔肯，叫我一直做俠女，我自己開始厭，每日都受傷，每日都拍打戲，我開始覺得自己係女武師。我由年頭拍幾套，年尾冇人搵，幾驚㗎，動作片從來片酬唔會比文藝女星高，動作片即使幾賣錢都係差。」紅姐約滿邵氏便決定離開。
由做焦點變被冷落，紅姐鑽牛角尖：「覺得自己冇用，有挫敗感好驚。」紅姐患上抑鬱症：「直到o依家我都唔知，到底係自己情緒出現病，定係所有病影響情緒，都係有雞定雞蛋先嘅問題，如是者輾轉反側，搞咗3年幾。」
「最差試過幾個月唔會離開自己間房，我哋住house，個個讓我住頂層，我唔落去，佢哋唔敢上嚟，連工人都唔敢上嚟，我有潔癖，冇人敢走入我服裝間或用我個廁所。我聽到二樓有聲，唔會落去，等冇人就衝落去拎一樽水，拎嘢食。最差時任何人都唔要見，即使行到門口，我都要搵藉口推人唔出去。」紅姐收埋自己：「最差時將廁所塊鏡封晒，一望鏡就覺得自己醜樣，好樣衰，掗佔地球，吸人啲空氣，乜衰嘢都喺個腦度，負面去到咁樣。嗰幾年一塌胡塗，間房臭㗎，我連起身望廁所，急到不得了都冇動力去廁所，刷牙洗臉都冇，係臭㗎！只攤喺張床度，攤吓又瞓，越瞓越攰。家人唔驚覺我有問題，因為我係咁，有時會突然返大陸做騷，及至出咗事先覺得有問題。」紅姐負面到極點還做出儍事。
撰文：比華利
攝影：林德雄
攝錄：葉君海
髮型：James Lee＠HAiR
化妝：littlewhite
場地：金公館