爆相爆片：
消夜男力戰攞你命3000

旺角噚日凌晨兩點幾發生血案！兩枱食客喺登打士街一間粉麵舖消夜，有人講嘢大聲嘈到隔籬枱，兩枱人嗌起上嚟，有人隨手擸起鉸剪拮落對方左邊臉近眼角，半邊臉披血。行兇嘅惡男之後同三個同伴帶埋把鉸剪走咗去，警方追緝緊佢。

懷疑傷人之後走咗去嘅男人大約1.8米高，事發時着住淺色衫。讀者譚先生經過見到兩班人「講數」，當時39歲姓張男人左邊臉都係血，俾三個男人圍住，一個揸鉸剪，另一個手執玻璃樽，隨時攞你命3000。揸鉸剪男鬧傷者：「我冇攞威，我係被動，係嚟食嘢！」對方指「我都係嚟食嘢！」鉸剪男火起：「你食嘢，你冇得罪我哋？我哋嚟食嘢，你XX我哋！」，再鬧爆「我就唔X放佢……我要個公道！」

企喺傷者隔籬嘅男性朋友代佢求情，雙手合十向鉸剪男講咗句「大哥」，鉸剪男都唔肯罷休，差人到場前佢先走。