話咁快又到親北京同建制陣營為10月中共建政搞慶祝，今年係中共建政69周年，愛國愛港人士噚日成立「香港同胞慶祝中華人民共和國成立69周年籌備委員會」，例牌由全國政協副主席、籌委會主席團執行主席董建華主持。舊年佢哋為緊跟國家主席習近平路線，就以「建設中國夢」做國慶文藝晚會，今年就用「迎接盛世」做主題。不過有政圈中人講笑話，𠵱家到10月仲有近3個月，用迎接盛世做主題隨時跟車太貼出事。
籌委會秘書長蔡冠深噚日喺記者會話，今年晚會同青年音樂會分別以「迎接盛世」同「時尚活力」為主題，用多種藝術表演，包括音樂、舞蹈、歌唱等形式，表達對祖國成就喜悅喎！不過有政圈中人話，𠵱家北京政治風向成日變，前排仲講緊厲害了我的國、中國製造2025超越美國，點知中美貿易戰一個浪打埋嚟，吹捧中共成就變為禁忌、中國製造2025變敏感詞，連官媒都唔畀講，北京仲放風話習近平原來支持要韜光養晦㗎！到10月萬一中國打輸貿易戰，要好似中興咁同美國求和，香港仲搞個「迎接盛世」晚會，到時幾諷刺呢！