呢排雖然股市升跌不一，有風有雨，但本港IPO活動，絲毫不減，據安永嘅數字，今年上半年香港有98宗，在全球排名第一，以集資銀碼計，共536億港元，全球排第五，下半年又有小米及中國鐵塔上市，本港IPO應可以全年站穩前三名。
六個月98宗，平均每月16宗多少少，以二十二個工作天計，每日有0.74宗，頻率都幾高，因為上市工作多數由「碧科」（四大核數公司）做，唔怪得一啲新進會計師做到日忙夜忙，做到唔識返屋企。至於律師樓方面，上市又係由十幾二十間律師樓包辦，負責嘅年輕律師連病都冇時間，以前律師T嘅公子在大型英資律師行工作，因為在港大畢業時夠叻仔，被選中咗去IPO小組工作，足足有十年時間「不見天日」，卒之毅然轉職，去上市公司做法律顧問。前一排同一間大型美國律師行資深合夥人吃飯，聽佢講仲誇張，有啲美資行求才若渴，直情去其他律師行搶人，搶人除咗大幅加薪之外，還會提供簽字費（signing bonus）及安頓費（settlement fee），加埋高達七位數字，有多無少。左丁山問：「簽字費我明，安頓費有乜作用？」律師W答：「有作用㗎！因為轉工轉環境，返工地點唔同會改變生活習慣，譬如你本來在中環返工，中午唔得閒出街食飯，食慣咗鏞記飯盒，但轉工去咗太古坊，食乜飯盒呀？偷閒冇得去IFC商場散一散心，鬆一鬆呀，不免若有所失，於是公司有一筆安頓費補償，依家有好多女律師，用呢筆錢買番一個納吉布夫人至愛嘅手袋，咪安樂啲囉，咪更易投入新工作囉。」咁都畀美資行諗到，服晒！但美資行慣咗隨時炒人，一旦IPO市場放緩，人頭好快落地嘅唧，律師W話：「工作逼人，我都過意唔去。過去十年，我見到不少手下女律師未拍過拖，冇時間吖嘛！我都替佢哋心急。有一對律師夫婦，在兩間不同律師行工作，大家不知何時放工，回家倒頭便睡。第二朝不同時間起床，即刻返工，兩人面對面傾偈時間就係中午在IFC四樓望住維港一齊吃三文治，講吓今晚輪到邊個清潔睡房！」如此誇張情景，令左丁山想起湯告魯斯年青英俊時嘅一套戲The Firm，扮演自哈佛法學院畢業嘅年青律師，香港應該冇呢類事情嘅，但IPO律師賺錢之辛苦法則大致相同。