32歲嘅前英格蘭隊長朗尼，上禮拜六就喺美職聯幫新東家華盛頓聯隊（DC聯）「地標」上陣，佢喺58分鐘後備落場，雖然冇波入，不過都交出一個助攻，幫DC聯主場以3:1擊敗溫哥華白帽，取得今季第三場勝仗，朗尼亦都延續佢每逢轉會踢地標戰特別醒神嘅傳統。
DC聯全場呼喚終入替
朗尼表明話係愛華頓唔要佢之後加盟DC聯，喺七月頭註冊完之後今場初次上陣，主隊喺27分鐘，由阿根廷中場阿沙特喺禁區外射球靚波領先1:0。9號仔朗尼千呼萬喚，喺球迷係咁嗌「We want Rooney」之後，終於喺58分鐘入替，DC聯69分鐘由前鋒保羅阿利奧拿整多粒，到78分鐘朗尼仲差啲入波，接應匈牙利中場史泰比喺左邊傳中，離門六碼銅頭一搖，不過客隊門將白賴仁路維就飛身撲出。踢到80分鐘，朗尼喺禁區外傳波畀保羅阿利奧拿，後者離門廿碼左右起腳射遠柱得手，雖然之後白帽破到蛋，但DC聯都贏3:1。
曼聯處子戰即「戴帽」
值得一提，今場除咗係朗尼地標戰，今場都係DC聯呢個Audi Field主場落成後舉行嘅第一場波，因為等個球場起好，所以DC聯比其他球隊踢少幾場，家陣以15戰得14分排東岸榜尾。朗尼都好開心幫新球會贏波：「我一路都聽到球迷嘅呼喚，當然好想落場即刻有料到啦，新球場好靚好有氣氛，我哋嘅責任就係要踢好啲波，等球迷更加興奮，吶喊聲更大！」
朗尼一向喺地標戰有一手，02年喺愛華頓出道第一場英超對熱刺，就交出助攻畀彭比治入波，04年去到曼聯處子戰歐聯主場對費倫巴治，更加連中三元兼有一個助攻，到2017年佢返到愛華頓，上季英超開鑼戰佢就射入全場唯一入波，主場1:0贏史篤城，所以今場交到一個助攻，對朗尼嚟講都好基本吖！