機會永遠留給有準備的人。前女子組合Freeze成員陳樂榣（Alley），多年前離開娛樂圈後，即趁着Art Jam大熱開辦畫室，至潮流退卻，又轉而開設自家品牌首飾店，她笑言最大滿足感是鑲嵌「高級朱義盛」，幫助不少冒失準新娘圓謊，打造一隻「失而復得」的人造鑽戒。相比做藝人的日子，Alley說︰「𠵱家開心好多！」
記者：劉卓瑩
11年前，陳樂榣與甄詠珊及石詠莉合組女子組合Freeze出道，滿約後拆夥，Alley從此脫離娛樂圈，並開始在畫室教畫，剛巧Art Jam（自助繪畫工作坊）興起，令本身有繪畫根底的Alley有發展機會。
「嗰陣時（做藝人）由幾萬到十幾萬收入都有，唔做娛樂圈之後嗰排好興Art Jam，我跳出嚟畫畫嗰陣時係好多學生，但收入就唔及以前。」Alley表示能夠做到自己有興趣的行業，感到十分滿足。
難忘為失戒新娘圓謊
可是，潮流來得快去得快，Art Jam熱潮短短一兩年間便減退，Alley又要找新出路，剛好韓風流行，她開始嘗試在香港銷售韓國首飾，但遇到不少困難，首先要到韓國買貨，但因為不懂韓語而被當地批發商冷待，Alley於是決心學韓文「（韓商）唔係太睬我，就覺得唔得，我又要去學吓韓文先，你識講幾句溝通到，佢對你態度又好啲。」結果成功取得對方信任，買貨就更加容易了，生意也越做越大，現時創立自家品牌門市，甚至在韓國設廠，擺脫娛樂藝人身份，變成一名成功小商家。現時其生意業務除了門巿，亦有繼續經營網購服務，範圍拓展至澳門、台灣和馬來西亞，主要貨品為戒指、耳環、項鏈等仿鑽飾物，她笑稱是「高級朱義盛」。
Alley表示，仿鑽首飾不單是一件「靚太用嚟晒命」飾物，還有另一重特別意義。「試過唔止一個客，上嚟我哋度面有難色，好似想喊咁搵戒指。佢話下個月就要結婚，但唔見咗隻求婚戒指，我哋就搵返最似佢嗰個卡數嘅石，再造返佢個design，刻返個卡數、佢同佢老公個名、日期。」最終女顧客成功過關，完成婚禮儀式。
生意的成功，要剛亦要柔，學懂圓滑做人，當年她為覓得一名好手藝的鑲嵌師傅，卑躬屈膝請求對方幫助，「一路咁樣求：『不如你幫我哋做，我哋真係好有誠意，好欣賞你嘅工藝！』又成日飛去韓國同佢食飯，斟茶灌水呢啲就唔少得㗎啦！過年我哋都會特登過去同佢拜年。」終獲對方答允出手襄助。
忙生意、忙照顧家庭，但Alley從未間斷教畫，「有時見到啲學生畫畫，佢哋有滿足感係我最開心嘅，然後自己又可以畫下，減下壓都要，因為𠵱家完全冇自己時間。」不過相比當年做藝人的日子，Alley說︰「𠵱家開心好多!」
