政府提供年金計劃，已達65歲之退休朋友紛紛研究「抵唔抵」，左丁山睇咗幾份報紙報導嘅資料，知道182個月回本（蘋果日報七月六日A4），男性65歲買100萬年金，每月取回5800元，182個月，共得105萬5千6百元，已超過本金，純講名義銀碼回本，173個月已經足夠有突。如果活到100歲，收銀35年，即收得5800元乘420個月，總收益係243萬6千元，咁就算幾好。深入啲睇，係政府精算師計數，同市民鬥長命，現時香港男士平均壽命係81歲，故此每月收款收足182個月（到時年齡係80歲兩個月），就略有得益，至於中途上天堂，就由遺產受益人接受，收到105萬總數就停。
成個遊戲係先用自己錢財，放在政府指定銀行，然後每個月從你自己嘅100萬（或最少五萬）扣番錢畀你，如果65歲買年金，活不過81歲，根本冇着數。但如果長命百歲嘅話，咪可以得到政府津貼生活費囉。
至於抵唔抵，有排拗，如以一百萬元買入今天市價之港燈（2638已逆市上升），假設係每單位7.85元，可買入127,000個單位（零頭唔計），以過往幾年年年派息4角做假設，每年可得50800元，即每月得4233元，少於年金派錢，但息率係5.09%，最大不同係，雖然股價有升有跌，呢127,000個港燈單位（以下從股票算了）永遠係你嘅，可中途退出（沽出可能有賺），而中途放棄年金就一定蝕硬，此外年金無對抗通脹能力，一旦通脹不斷上升，年金價值日降，但在通脹上升情況下，你估電費加唔加呢？股價升唔升呢？港燈屬公用股類別，公用股有抗跌特徵，比較穩陣。還要考慮到，一百歲歸天之後，買年金者已用盡一百萬，買2638者有可能還有價值100萬嘅股票留給子孫（講句保險說話先：以上所言，不構成投資建議，股價有升有跌，風險自負，可將「港燈」二字，改為「長建」、「領展」、「中電」、「恒生」、「滙控」）。朋友話：「你講嘢就叻，行動點先，你買唔買年金？」左丁山老實答覆：「因已經有咗港燈、滙控及其他REITs，唔再買年金咯！」點知後來惡佬明打電話嚟問同樣問題，左丁山以上面見解作答，惡佬明話：「有冇諗埋你到咗80歲，分唔出，記唔起2638還是3628或是3826㗎，買年金似乎更簡單噃！」真係畀佢激親，講啲咁嘅嘢，但也須承認，老人家如怕腦筋日漸退化，管理不了投資，買年金係簡單利落！