今年78歲嘅自由黨創黨主席李鵬飛主持港台節目《議事論事》超過17年，今年7月正式榮休，《議事論事》特別請返飛哥做嘉賓錄影最後一次節目，嘉賓仲包括同飛哥由政見上針鋒相對，到後來惺惺相惜嘅民主黨創黨主席李柱銘（80歲）、民建聯創黨主席曾鈺成（71歲），三個加埋229歲嘅政黨巨頭聯同飛哥睇住佢由AO做到財爺嘅曾俊華一齊話當年。
曾鈺成爆肥彭憎飛哥
飛哥係1991年同嚟自商界立法局議員成立啟聯資源中心，到之後再變成自由黨首屆主席，從不諱言有個執政夢，佢憶述當年嘅豪情壯語，話立會倘有普選，民主黨最多管五年，「因為佢唔識管治」，之後輪到民建聯，「但最多五年貨仔」，因為民記有基層支特，但唔識生意人、律師，最後輪到自由黨，笑言「自由黨will執政for a very long time！因為我哋各方面都識！」
李柱銘感慨當年大部份人預期07、08年會有普選，「係成個香港嘅共識」，點估到嚟到今日咁環境？飛哥慨嘆前國家主席江澤民曾指摘記者「too simple, sometimes naive」，估唔到too simple嘅竟然係佢哋，無法預見今日嘅社會情況。
講到現今政治，曾鈺成話𠵱家所有政黨明知冇得執政，連民記都要諗選票，唔可以盲撐政府；李柱銘即時話，中央係想民記好似執政黨咁，實際上係共產黨執政啫，仲話民記盲撐政府流失嘅選票，「共產黨會畀返選票你嗰啲人㗎嘛！」
再回帶到港英年代，曾鈺成又大爆末代港督彭定康好討厭飛哥，笑言當時喺港督府會見肥彭時，當肥彭隻狗仔吠，「佢就會話啟聯啲人嚟咗」。飛哥又大爆肥彭當年一到港想畀個爵士位佢，認為對方旨在要啟聯喺立法局嘅票，所以無接受，肥彭見箍票不成就嬲咗，後來飛哥因為不滿民主黨博表現，冇支持司徒華譴責肥彭動議，事後肥彭去信畀佢，大讚佢公道，「封信仲喺度啊！」雙方亦一票泯恩仇。
李八方