呢幾日不時橫風橫雨好似打風咁，喺戶外工作嘅人都幾狼狽，想話搵個位有瓦遮頭避雨，點知搞到大打出手，何必呢？有網民前晚大約10點喺旺角避雨，見到兩個阿姐又扯頭髮又出拳打起上嚟，於是拍片擺咗上fb「巴打絲打 Facebook Club」，網民紛紛留言表態。
網民直言「好狼」
片段影到相信係女人街行人路近豉油街街口，着灰色裙嘅女人扯住一個紅衫女人嘅頭髮，然後將佢撞埋一堆篋度，紅衫女跌跪落地下，灰裙女連環六拳狂揼對方後腦同膊頭，網民睇完片都話佢「好狼」。有女途人睇唔過眼出聲：「儍咗呀？黐線㗎？報警喇喎！」最後有個男人做和事老：「喂，唔好打喇！」男人將佢哋隔開，「你哋兩個一把年紀」。
拍片嘅網民話初頭兩女為避雨問題鬧交，係紅衫女出手打人先，片段並非全部過程。有網民就話識得片中三人，灰裙女派傳單嘅，紅衫女喺排檔賣篋，勸交嘅男人就係附近藥房職員。有網民慨嘆：「香港日日都有人打交，不如大家文明一點，打交只會犯法，不會解決到件事！」