飛哥作為政壇元老級人物，佢榮休唔做港台節目《議事論事》主持，以後市民少咗機會可以喺電視睇到飛哥評論時局。佢噚日錄影周四出街嘅最後一集節目，仍流露出佢對現時香港政局嘅擔憂，話今日香港社會分化程度係前所未見，各方完全冇得坐低嚟傾。
寄語娥特放手下屬
飛哥希望特首林鄭月娥向北京講清楚，目前重要任務係大和解，因為大和解唔到就只會越嚟越分化，又希望民主派想辦法同娥特建立溝通渠道，令中央同港人都信娥特。飛哥喺錄影完之後又再講，話社會分歧會犧牲人才同經濟，所以大和解係𠵱家香港發展最重要議題，唔係起唔起港珠澳大橋！希望北京唔好管住娥特做呢啲嘢。
咁飛哥又點睇娥特上任一年嘅表現？飛哥好坦白形容，娥特個問責班子，不論司局長都唔似一個團隊，好似執藥咁，都唔知有乜共同理念，佢又暗示娥特組班有內地插手，直情話「你估係Carrie（娥特）自己搵㗎咩」，又話咁樣組班對香港有害無利。飛哥又不忘提醒娥特，勿將所有事情揹上身，應放手畀下屬做，佢寄語娥特要明白，個人努力無法左右大局，應該要下屬話畀你知要點做。