民主、建制派難得三位元老級前黨主席坐埋話當年，而作為公民黨現任黨魁嘅「AY」楊岳橋亦有新搞作，而AY今次唔係要瘋魔萬千少女，而係要改進社會風氣，提高青少年人內涵，咁佢搞乜呢？原來係搞讀書會。
AY原來係一個「歷史膠」，最愛讀有關歷史嘅書籍，佢計劃喺暑假成立「AY Book Club」，邀請中四至大學四年班嘅學生聚首讀書。AY話因為自己真係好鍾意睇書，希望可以搵到班志同道合嘅朋友，一齊分享讀書樂趣。最近佢就睇緊女作家林達巴黎之行嘅一本隨筆集《帶一本書去巴黎》。
要參加AY嘅讀書會，方法好簡單，只要寄封信去立法會810室，分享自己最近睇嘅書或者閱讀心得，再寫埋回郵地址加聯絡資料，AY就會寄返一本佢親自揀嘅書畀大家，再喺8月底親身同大家見面分享閱讀樂趣。而喺下周四嘅書展期間，AY仲會去到兒童天地舞台，同小朋友講《醜小鴨的故事》。