爆相爆片：老鼠幫襯大家樂　閃電被逐

喺食肆見到老鼠，唔知食客仲有冇胃口食嘢呢？有讀者報料，分別喺天水圍同青衣嘅食店見到老鼠喺店內竄嚟竄去，但當時兩間食肆在場人士反應大不同，有人立即出手捉老鼠，亦有人當自己時運高睇唔到，真係千奇百趣。
謝小姐同小記講，上星期五（13日）夜晚7點左右，喺天水圍天慈商場大家樂分店準備食晚飯，其間發現一隻有大人手掌咁大嘅老鼠，喺店入面慌失失咁到處亂竄，當時有廚房職員見到咁嘅情景，即刻走上前踩住老鼠條尾，令佢走唔到，然後即刻用個白色膠袋笠住佢執走，幾分鐘之內就清理現場，過程非常利落，其間在場食客好冷靜，冇人咿嘩鬼叫。

酒樓員工當睇唔到

另一名讀者林先生，同一晚喺青衣城商場靠近欄河傾電話嗰陣望落去地下嗰層，見到稻香酒家嘅開放式廚房，有兩隻老鼠喺枱面𠱁𠱁轉，當時有一名女員工喺櫃桶攞完架生行過，佢好似望到兩隻動物，但照樣行咗去。林先生話估唔到咁大個集團，俾人睇到衞生情況有問題，冇即刻去處理，「至少捉咗都好，唔好俾人見到」。小記噚晚分別致電兩間食肆查詢，職員都叫小記聯絡總公司了解。