網上流傳一段城巴同途人爭路嘅片段，引起網民熱烈討論。片中所見上星期五（13日）朝早11點幾，一架城巴左轉入筲箕灣阿公岩道路口嗰陣，咁啱有個身穿黃衫嘅阿叔擔住把遮過馬路，佢行到路中心，城巴車長即時砵佢，但就冇收慢車速；阿叔亦毫無懼色，繼續施施然過馬路。結果城巴右邊車頭碰到阿叔把遮，城巴車長即刻停車，並爆粗與阿叔罵戰。
車長望向企喺路邊嘅黃衫阿叔大鬧：「X你呀！」阿叔即時還口：「人企喺度你就要停，我行咗先我就佔用路面！」車長唔同意駁斥，兩人嘅指罵聲重叠，只聽到阿叔話「唔係你劈住彎就可以」，車長即時反駁：「我冇劈住彎呀，我同你講！」阿叔指住馬路：「你唔係劈住彎？我行咗出嚟𠵱度。」此時另一名「塘邊鶴」阿叔亦同聲同氣鬧車長：「你仲要畀油你就唔啱啦！」車長怒極回罵：「邊有呀，X街！」
網民各打五十大板 車長暫停職
大部份網民認為車長駕車態度危險，亦有網民形容雙方都有錯，「巴士見阿伯擋咗去路就唔應該一路比油一路響號……阿伯過馬路又大支嘢，聽佢講就死得，乜原來行人行咗出馬路就大晒？」
城巴發言人回應事件，指片段中涉事85號線城巴，當時由小西灣藍灣半島開去北角寶馬山。發言人強調公司一向有為車長提供長期培訓，以提升安全駕駛意識，就片段中事件，公司會按既定交通事故處理程序處理；若證實車長須對事故負上責任，公司會作出適當紀律處分。小記收到消息，有關車長已被暫停駕駛職務，等候城巴進一步了解事件。
