韓國女團f(x)前成員Sulli之前因為成日冇戴bra喺Instagram晒自拍而引起網民爭議，早前佢就飛咗去德國拍攝真人騷節目《真理商店》，返到韓國後佢日前就上載一段短片及照片，當中佢就試下近期大熱嘅冷凍桑拿，有指呢個冷凍桑拿有減肥作用，又可以促進血液循環等功效。
Sulli當日試玩時一臉痛苦，事關個儀器會令佢即時置身於零下氣溫，當中可見佢由零下99多度一直維持到零下130多度，佢表情顯得好辛苦，似乎難以忍受。不過佢今次嘅嘗試就引起網民熱話，事關有指只要置身儀器內3分鐘，就即可以消耗800卡路里，成效聽起來好犀利咁。不過網民就覺得冷凍桑拿功效被誇張化，亦覺得做呢啲係貼錢買難受，仲勸其他網民唔好亂試，應該要諮詢醫生先好嘗試。