泰國清萊「野豬」少年足球隊（圖）成員同教練被困洞穴內17日，最後一行13人全部獲救。早前國際足協主席恩芬天奴，就話過希望邀請佢哋去俄羅斯睇世界盃決賽，但之後經醫生證實佢哋趕唔切好番，所以就去唔成，不過FIFA都準備請佢哋9月24日去倫敦，出席FIFA嘅頒獎禮。恩芬天奴早前就話，呢班泰少足球隊成員仲會做頒獎禮嘅尊貴嘉賓。
FIFA頒獎禮當日，將會公佈2018全年男女子最佳球員同埋最佳教練，上年拎到男子最佳球員獎項嘅葡萄牙球星基斯坦奴朗拿度，上季就幫皇馬締造歐聯三連霸，今年都係奪獎大熱。換句話講，呢班泰國少年好可能有得親眼睇佢拎獎。