世界盃今晚嚟到季軍戰，比利時對英格蘭，兩隊雖然與大力神盃無緣，但為榮譽而戰，無理由唔搏埋最後一場，係咪？
雖然ViuTV一早公佈咗，季軍戰冇得播，但作為球迷好應該去支持，今晚東港城舉行咗個世界盃活動，可以熱熱鬧鬧咁一班人齊齊直播睇波。
大約晚上9點45分，已經約有2,000名球迷到場準備睇波，東港城除咗有安摩椅，亦都有好多梳化俾球迷坐定定睇波，入唔到嘅街坊，有啲冇帶櫈仔，又唔想企，就揀咗席地而坐，東港城亦都派咗兩隊旗仔、口哨等球迷隨時可以打氣。
一開波時球迷們已經好雀躍，結果呢場比賽4分鐘就有入波，入波一刻全場熱烈歡呼，有比利時球迷高叫：「入得好。」10歲小朋友康康跟媽咪梁太睇直播，康康話好鍾意英格蘭，梁太就話帶囝囝睇球星，兩母子都係第一次去商場睇波，康康見到愛隊先失球，佢都話有啲失望。
周生先第一次嚟東港城睇直播，佢着住英格蘭球衣，不過愛隊落後一球，佢話：「無計啦，踢得好渣，好後生，冇咗個種power同團結力，好似冇咗中心點咁。」張小姐着比利時球衣：「我覺得英格蘭踢得唔好，比利時入咗一球好開心，希望入多一球，聽日唔使返工，可以嚟睇波都好開心。」
17歲嘅柳同學話係英國讀書，依家都支持英格蘭：「論組織，比利時比英格蘭好，夏薩特同迪布尼表現好，史達寧就麻麻地。英格蘭成隊都後生啲，希望打多半場可以贏番。」
採訪：黃曉妍
攝影：林賓尼
tag:_theme_worldcup2018,_theme_worldcuprussia18