領先莫雷拉4場頭馬的「準冠軍騎師」潘頓，在周日(15日)沙田煞科戰第八場一班1600米，策方嘉柏馬房的「跳出香港」，馬主團體成員羅雪儀是潘頓好友，她希望愛駒順利連捷，以行動支持潘頓做冠軍。
羅雪儀說：「潘頓今期手馬都幾強，如果好運一點，交出3至4Win也不奇，我當然希望其中一Win是『跳出香港』啦。同場『幸福分享』上場亦由潘頓贏，今次他再策『跳出香港』，我估計非潘頓揀騎，而是方嘉柏一早book定他策『跳出香港』。」
「潘頓與我一家均是好友，但過往我們試過數次找他騎馬，都因他分身不暇未能成事。有見及此，今次『跳出香港』出賽，方嘉柏早於上月初已搵定潘頓再策，以免他又分身乏術。老實講如非方嘉柏醒目，相信潘頓已大有機會替東廐『幸福分享』效力，一來『幸福分享』上場配潘頓贏得輕鬆，二來告東尼大賽子彈多，潘頓為增加日後合作機會，揀騎『幸福分享』的成數很高。」
「講番『跳出香港』，牠已連搏三場兩冠一亞，方嘉柏表示由於牠未算強壯，因此專登讓牠小休近兩個月，恢復元氣，以迎接煞科戰。不過，我個人就有少少擔心，我認為『跳出香港』可能尚需要多試一課閘磨起狀態。今場對手中以『幸福分享』及『達羅素』最強勁，『跳出香港』則應有三甲機會。」
「其實我們和方嘉柏對『跳出香港』期望幾高，好希望下季牠可進軍國際賽，因此想在今場搶分，如果下季贏到大賽，就有望回本。坦白講，買入一匹身價800萬以上的馬，如果唔贏級際賽很難回本。」羅雪儀續說。