一位老師被派去教育局上堂，聽教育官講甚麼values in education，即是講教育的價值觀啦，分開三個主題，老師聽啲唔聽啲，只記得教育官講兩個主題，第一係性教育，第三係基本法，第二個已經忘記了，因為掛住專心聽主題中的主題──基本法教育。老師話：「性教育只係講咗十零分鐘，第二個主題亦係輕輕帶過，講基本法教育就用咗個幾兩個鐘頭，聽到一眾老師頭昏眼花，我最記得嘅就係，講基本法，嚴禁在學校提及港獨，呢兩個字一定禁用，任何關於港獨嘅討論都不可以。教育局反來覆去，向我地洗腦！」
類似洗腦嘅形式有好多種，用得比較多而受歡迎嘅就係津貼遊埠，去國內大城市參觀交流，例如去上海就最易打動教師之心。一位教師講：「教育局有大把錢支持到內地交流項目，只要申請，搵齊二三十個學生起碼，加幾位老師，就可申請教育局資助，差不多實批准。當然唔係全部畀晒，學生去上海四五日，都要自己出番千三四蚊嘅。」
出千三四蚊遊上海四五日，抵到爛，但有啲貧窮學校有好多清貧學生，一樣拿不出呢筆錢，此則要校董會（學校管理委員會）籌款或校董捐錢，等班學生出去見吓世面。點解教育局咁熱心資助、補貼回內地交流？唔駛講得咁明啦，有不少老師未經患難，到一線城市或杭州南京睇到市面硬件建築咁先進，已經信了習近平一半，再受「久經訓練」嘅內地人員招待及講話，又信多三成，返到嚟香港，又周時有「朋友」傳來微信微博鴻文：「日本驚慌了，美國震驚了，台灣害怕了，中國厲害了」呢類文章，自然又信多一兩成，思想開始向左轉。不少自加拿大美國回歸嘅香港移民，都經歷過呢種經驗後，為中國說好話，說美國壞話。每個人各有所好，思想向左轉，別人不得干預，從呢方面睇，中共祭出三大法寶──統戰──加上特區政府教育局配合，似已漸有成果，林鄭之銀彈政策有效（上台時即撥五十億支援學校，連教協都立即收咗聲）。在內地長大發展之人又點睇？照計應該充份表現愛國精神，支持中國共產黨，支持習主席嘅唧？點知胡潤出咗一個中國移民報告，中國富翁愛移民首選係率先發動貿易戰嘅美國，最鍾意置業之城市前五名都係美國──LA、紐約、波士頓、三藩市、西雅圖，之後係倫敦、溫哥華、多倫多。你估在中國長大發財嘅中國人對中國認識多啲吖，還是香港教師或美加回歸嘅香港移民呢？