眨眼來到馬季煞科日，88個本地賽日話多與少，在乎你有幾熱愛賽馬，或對職業賭客來說可能覺得跑得就跑，全季跑馬都舉腳贊成。
漫長的馬季人馬都疲倦，始終像機器一樣，會有壞的一日，要有適當的休息期，儲新鮮感後更有動力工作。現時暑期休息時間短了，好彩筆者入行的時期已接受這個事實，否則與以往馬季有比較，身心會更疲累。
下季馬圈變動甚大，先有從化訓練中心啟用，日後觀看馬匹狀態或操練方式截然不同；新的騎師陣容是否只有潘頓獨大，還是另有其人？蔡約翰會倚重哪個騎師出擊？本地騎師能否分一塊餅？很多事都存在問號，新季大家必須用時間去適應！
冠軍人馬獎各獎項名花有主，香港馬王寶座最終由「美麗傳承」奪得，成為「美麗系」第一匹馬王賽駒。莫雷拉亦當選最受歡迎騎師，獲獎後識英雄重英雄，走到潘頓面前擁抱一番，冠軍騎師星期日就會揭曉！
煞科日(15日)最尾第11場三班1400米，「輝煌星」增程論腳法更為合適，雖然來港後經跑過1400米落第，但當時C欄排14檔難度甚大，不足為據，上仗跑1200米末段追勢甚多得季軍，同父系馬大多1400米無難度，今次增程高度留意。
對手方面，「錶之太陽」算是今季大摩三歲新星，跑四仗非冠即亞，上仗二班時間快得驚人，持續進步！「勇霸神駒」評分處於高位，但勝在夠準繩，今季仍未甩獎金！「志同道合」排14檔如放得出，走得快好世界，最緊要能控制馬匹韁口！