俄羅斯世界盃踢埋今晚決賽就完，四年後嘅下屆，就會移師去到夏天可以熱到攝氏45度以上嘅中東國家卡塔爾主辦，而國際足協（FIFA）上個禮拜五就確定，下屆世盃將會搬去11月21號開幕，12月18號踢決賽，同平時慣常喺六至七月舉行相當唔同，而到時各大聯賽都要暫停。
天氣太熱達45度
世盃一路以來都喺北半球嘅夏天舉行，但係由於卡塔爾屬熱帶沙漠氣候，常年炎熱乾燥，夏季最高氣溫可以去到攝氏45度以上，所以卡塔爾喺申辦時，就話會起有冷氣而又確保到草地質素嘅室內場，但其實三年前FIFA已經戴好頭盔，提議2022世盃改喺冬季搞，咁當然受到各大歐洲聯賽賽會反對，因為會打亂晒全球嘅足球時間表。
不過，不嬲都一言堂嘅FIFA上星期五就一錘定音，主席恩芬天奴宣佈，下屆世盃喺11月21至12月18號搞，暫時未知球會賽事由幾時開始暫停，各大賽會亦都未畀反應。除咗11月搞世盃之外，恩芬天奴亦都提到下屆好可能會擴張到48隊比賽。卡塔爾申辦世盃成功，有賴時任FIFA會長白禮達大力幫手，佢就因為貪腐醜聞台已落，不過𠵱家係咪另一種換湯不換藥？
恩芬天奴大讚VAR
而對於VAR喺今屆世盃應用成功，首次喺大賽亮相幫到手呢項政績，恩芬天奴就梗係吹捧吓自己，話數據上四強或之前嘅62場世盃，VAR改變咗球證19個決定，糾正番當中16個錯誤判決：「呢個係進步，好過以前好多，VAR冇改變足球，但令足球變得更清楚同誠實，幫到球證做正確決定，從今以後再冇球員會喺越位情況下入球。」
而且，恩芬天奴認為VAR令到粗野犯規減少，所以今屆頭62場世盃冇球員因為暴力犯規被逐：「大家都知，現場有30部攝影機睇實，然後可以重播你嘅行為，你會被趕出場。」