英格蘭殺入世界盃四強，幾乎全部英軍球迷都高呼足球返到發源地之餘，喺四強賽前班英粉仲開心得滯周圍辣火頭，竟然寸到去法國新星基利安麥巴比頭上。不過，三獅軍團周三喺四強踢到加時，最終以1:2不敵克羅地亞，奪標無望。麥巴比即刻喺ig寸爆英軍球迷，仲話：「It's coming home？冇可能呀！」
英迷twitter先挑機
法國喺周二另一場世界盃四強賽事以1:0小勝比利時，率先打入決賽。當英軍出戰四強賽前，就有唔少英軍球迷到麥巴比嘅twitter留言，似乎想挑釁呢位效力法甲巴黎聖日耳門（PSG）嘅射手。有位用戶名為UnspokenTruth80嘅英軍球迷話：「除咗最後五分鐘，你嘅表現都幾好。下次對英格蘭，哈利馬古尼會守死你。」又有個用戶名為LiamBeech9嘅網民話：「希望你輸畀英格蘭。」仲有唔少帶侮辱成份嘅留言，真係未入決賽就囂定先。
普巴爭冠宣言好激情
可能英格蘭球迷呢番說話辣㷫咗麥巴比，所以呢位19歲法國新星喺英格蘭出局後，就即刻喺ig story上載一張有「It's coming home」同「冇可能」字句嘅相，仲話：「好對唔住，我好鍾意英格蘭，但對於一啲直到𠵱家仲傳愚蠢訊息嚟侮辱我嘅人，呢個係你哋應得嘅結果！」不過，當英國傳媒大事報道呢件事後，可能麥巴比都知衰就即刻刪post，扮冇事發生過。
法國下周日就會喺世盃決賽硬撼克羅地亞，球隊另一主力保羅普巴近日亦發表爭冠宣言，似乎想帶領「高盧雄雞」奪冠。呢位25歲曼聯中場話：「足球係我嘅摯愛，亦都係我第一樣鍾意嘅嘢，我為足球而生，亦為足球而戰。我唔會話自己好後生，但同時我唔算老，我會繼續努力、繼續進步。不論我聽到讚美或批評，我都會繼續為最愛而戰。」
