七月十日蘋果李華華寫李家傑猛讚「大灣區速度」，談及李公子平日好低調，罕有出現於公開論壇。七月九日居然現身，在新城財經台「亞洲商貿論壇」（星展銀行贊助），主講粵港澳大灣區未來在亞洲的經貿角色與地位，係以一國兩制中心主席身份出現嘅。過往一國兩制中心行雙主席制（理事會主席、執委會主席，分別由梁振英及陳啟宗出任），梁振英做咗特首之後，呢個中心由陳啟宗管晒，及至梁振英不連任，一國兩制中心索性改為「一頭馬車」，李家傑單騎上陣，只有一個主席。聽講李公子對研究大灣區、AI、第四次工業革命與科技尖端議題極為上心，自己做埋功課，對各題目都好熟悉，故此今次演講大灣區，在場之商界人士一致給予好評，可謂選正場合，揀啱時機，一炮打響，令商界人士耳目一新。
左丁山到場遲，去到萬豪酒店會場，李公子與陳繁昌校長已演講完畢，陳校長慣咗在大場合演講，講得好唔出奇（香港創新經濟與科技教育的相互關係及拓展優勢），反而不少在場老友捉住左丁山講：「唔早啲嚟呀，我哋第一次聽李家傑演講，估唔到佢講得咁有條理，內容紮實㖭！」背後有冇軍師？點知噃，左丁山與李公子吃過一次飯，聽佢講古仔，範圍廣闊，引經據典，顯然係平時閱讀甚勤之輩，演講有料到，不足為奇。
聽講李公子與科大校長好熟，在萬豪VIP房，兩人以Peter、Tony相稱，老友鬼鬼，Peter問Tony去咗沙特阿拉伯做KAUST校長之後，有無合作機會。Tony就即刻回應，只要Peter願意，佢一定盡力協助。照計KAUST擁有永續基金二百億美元，學生（全是研究生）只有一千二百名，銀紙大把，唔使香港李先生捐款嘅嘞，不過沙特對中國及一帶一路有戰略性意義，Peter與Tony將來有項目合作機會，一啲都唔奇。
可惜李公子事忙，演講後冇時間接受記者訪問就向主辦單位告辭而去，記者後來聽工業總會主席郭振華、貿發局研究總監關家明、星展銀行（香港）董事總經理張建生三人講及中美貿易戰，剛好配合時事，於是在場記者「群起圍攻」，包圍訪問。左丁山後來遇到電子界元老、工業家陳其鑣博士，問他對貿易戰點睇，陳博士話另有見解，一時間唔講得咁多，要再約時間詳談！