你想起耶穌、佛祖抑或某位良師益友？很遺憾，恐怕不是。再好學的人也無可能睇書入腦過睇戲，所以，潛移默化從幼影響着你，乃一班壞鬼編劇，真悲催。
編劇，在圈中沒甚地位，自己亦看不起自己，但弱者有弱者阿Ｑ精神──有否發覺，影視裏的科學家通常描繪得神經兮兮、不通世務？因為編劇盡皆文科人也，嫉妒理科人，順手便醜化一番；相反，受尊重、好老師的角色則總設定為文史哲界，往本科臉上貼金。我就此受誤導，中學選修arts，恨錯難返啊！
並非有些人叻理科有些人叻文科，而是根本叻人讀理科、冇咁叻的人讀文科，看看DSE狀元歸邊便知。編劇既來自文科排除於菁英之外，推而廣知，不單仇恨專業人士，更仇富，筆下凡做醫做官必定衣冠禽獸，豪門必定為爭產喪盡天良，草根卻親慈子孝有情有義云云（典型例子見於韋家輝作品）。用膝頭哥諗諗就知怎可能？窮人更常見的是發窮惡，什麼虐兒致死、鄰舍衝突永遠發生在低收入社區，你倒試試家住淺水灣會否因為蝸居狹窄而發老脾打罵兒女？會否因為麻雀聲浪嘈到隔籬屋而揮刀互斬？有產爭好過食個橙都要爭。你相信仗義每多屠狗輩，結果只會遭屠狗輩搵笨；你以為深水埗人情味濃厚？除非你貪一樓一鳳和買白粉方便囉。
但編劇又並非崇尚清貧喎，他們潛意識裏渴望「駙馬命」，詳情請參看鄭裕玲／劉嘉玲飾演千金小姐向小伙子萬梓良／黃日華投懷送抱各套經典，關海山做闊佬未來外父那些呢。自詡街頭智慧和誠信足以令有錢人招婿，於是《流氓（可變）大亨》、《赤腳（可變）紳士》，拆穿無非不勞而獲心態。唉現實財主哪有咁好騙？否則day one不可能發達啦。
編劇們讀書不成，又扮傲骨博僥倖，三方面都恰似黑社會，恭逢九十年代影圈潮流一拍即合，江湖大佬投資開戲自吹自擂，最愛情節莫如卧底探員遇到的社團中人竟比警方更講義氣，氾濫成香港特有片種，歪曲價值觀，影響至今，《飛虎之潛行極戰》借苗僑偉之口嘲笑：「邊會咁多卧底？」但這套劇偏偏又係咁多卧底。遙憶當年，我哥哥志願投考警察，家母起初贊成，忽然醒起拚命反對：「阿媽驚你要做卧底呀！」遂與當差無緣，算不算改寫人生？