尖沙嘴文化中心海傍一向都有唔少遊客同巿民去嗰度影相吹海風，噚日現場警車、消防車同救護車齊集，氣氛緊張，原來有人墮海。湯先生朝早11點幾行街經過海傍，見到人形物體喺海面浮吓浮吓嘅情景覺得好驚，「佢有着衫着鞋，個頭向岸邊，對腳向灣仔嗰邊，反轉咗身冇晒反應」。當時有途人報咗警，先遣急救員、警車同消防車好快陸續到場，一個軍裝阿Sir一馬當先除制服跳落海救人。
在場救援人員將岸邊嘅救生圈拋落海畀阿Sir，佢一路游一路問方向啱唔啱，但事主越漂越遠，至離岸約50米，岸邊嘅人指示阿Sir「直去直去」，直至綁住嘅救生圈同岸邊條繩已經拉到最盡，阿Sir仲有差唔多6呎距離先接觸到墮海嘅事主，佢就繼續游，終於將事主救返近岸，再同消防員合力將女事主抬返上岸，她已經昏迷，稍後由救護車送佢去醫院搶救。
送院搶救命危
墮海嘅事主原來係一個70歲婆婆，警方初步調查相信佢因為家事唔開心，懷疑佢一時諗唔開做儍事，婆婆𠵱家留醫，情況危殆，希望佢大步檻過。