64歲日本男星石田純一月前再做老竇，其第三任太太東尾理子以42歲之齡誕下B女，佢哋本身已有一仔一女，而石田純一亦與兩任太太，分別育有大仔石田壹成，同任模特兒嘅囡囡Sumire。
石田純一啱啱再做老竇，太太東尾理子亦忙於照顧小朋友，不時於社交網站公開仔女生活照。不過有報道話，近日石田純一被目睹不時於六本木與麻布區嘅夜店流連，仲不時有年輕美女相伴。日前，石田純一喺六本木嘅一間夜店出現，身邊有一位20幾歲嘅靚女，當時佢飲到醉醺醺，仲將頭挨近靚女嘅胸口，相當親密。有石田純一身邊人就透露，話石田純一年過60歲仍然風流，但當晚佢可能只係借醉抽水，兩人未必有下文。