民建聯自世界盃開始，就不斷撐邊隊死邊隊，之前民記喺facebook出post話撐阿根廷、德國，結果兩隊俾佢燈到冇得贏，最終仲出埋局，之後民記呢個「燈神」靜咗一排，前日又再發功撐英格蘭，結果真係燈死埋！有撐英格蘭網民對民記唔撐中國走去撐英格蘭好不滿；亦有人揶揄法國拎唔拎到世界盃，民記或成最大障礙。
再搞法克決賽投票
前日民記喺facebook出post搞網民投票，睇吓大家認為克羅地亞對英格蘭邊隊會贏，原本民記個po有晒克羅地亞同英格蘭國旗，理應燈力應該兩隊平分，但英格蘭嗰邊竟然有周浩鼎、劉國勳、張國鈞三個立會議員撐，結果燈力乘大三倍，就咁燈死咗英格蘭！一班撐英格蘭網民自然嬲到震，大鬧民記咁愛國愛港，做乜無端端去撐英格蘭？亦有人鬧民記係想曲線撐克羅地亞！更有網民揶揄法國拎唔拎到世界盃，最後障礙唔係克羅地亞龍門而係民建聯！
唔知民記係咪聽到網民「呼喚」，噚日佢哋再搞法國對克羅地亞決賽投票，已冇任何議員表態撐邊隊，只用個民記卡通人物建仔，仲出po話冇諗過會因「燈」成名！反問網民想佢決賽燈邊隊？
李八方