旺角街頭打鬥事件中警方拉咗紅衫男襲擊，但就唔係拉晒兩個人打交。陸偉雄（圖）大狀解釋，如果警方喺好早階段已經出現，見到兩個人打交，應該兩個都拉晒，但相信因為警察係後期先到場，見到傷者瞓喺地下，之後拉咗紅衫男襲擊亦係無可厚非。陸大狀補充，唔排除警方進一步調查之後，會修定對紅衫男嘅控罪，甚至拉埋四眼仔。
陸大狀指短片中出現咗兩個罪行，包括香港法例第212章《侵害人身罪條例》第39條襲擊致造成身體傷害，即係𠵱家紅衫男俾警方拘捕嘅罪名，一經定罪，最高可被判監禁3年。
打交可判囚一年
而另一罪行就係香港法例第245章《公安條例》第25條喺公眾地方打鬥，如果循簡易程序定罪，片段中兩個打交嘅男人，可被判罰款5,000蚊以及監禁12個月。