中美貿易戰有排打，工聯會「醬爆」陸頌雄唔知係咪見國難當前，響應「撐國貨、抵制美國貨」，喺facebook上載最新入手「玩具」（圖），係國產鏡頭廠老蛙（Laowa）生產、價錢約3,000元嘅超廣角鏡頭，話一直希望用上「優質自主品牌」嘅全國產鏡頭，不過光學領域係中國製造「軟肋」，家陣終於有「爭氣」自主品牌，佢大讚國貨「連日本原廠也做不到如此輕巧的大光圈，解象（像）力表現優異」。
有網民笑佢支鏡最後咪又要用在外國品牌相機！既然咁愛國貨，應該搵部中國自主研發嘅上海海鷗牌相機嚟用！亦有人笑佢，支鏡只係手動鏡，冇晒原廠鏡入面嘅自動對焦等零件，梗係又細又輕巧！