基斯坦奴朗拿度（C朗）轉戰意甲，那邊廂本身有播開意甲嘅大台收費頻道，喺上季結束後已經約滿唔會繼續播，唔少球迷都擔心新球季睇唔到C朗着住祖雲達斯球衣踢意甲比賽嘅直播，不過C粉同意甲球迷都可以放心，電訊盈科媒體喺噚日宣佈同beIN SPORTS達成協議，旗下嘅「現在」台將會直播未來三季西甲，每季全部380場波；另外仲有意甲、法甲、美職聯、阿根廷同土耳其聯賽。加埋之前宣佈嘅英超同本身有嘅德甲，想睇C朗、美斯定朗尼都冇問題。
另外，預計會喺周一正式亮相舉衫嘅C朗，去到祖記將繼續着7號波衫，至於原本7號嘅主人，哥倫比亞中場古達度，日前出post歡迎C朗，話唔介意讓件7號波衫畀新隊友。