【本報訊】中學文憑試昨日放榜，來自喇沙書院的黃子衡成為歷屆首名考獲8科5**及在數學延伸部份亦考獲5**的「18*」超級狀元。黃子衡說，成績表上18顆星星得來不易，要非常自律，每日除了吃睡，大部分時間都在自修室溫習，不能偷懶。他又寄語其他考生，大學畢業證書並非人生的全部，「做人態度要有上進心，人脈交際都好重要，考試考得好唔可以自滿，考得唔好都唔緊要」。
「我嘅人生就係音樂」
成為歷來首名18*狀元，黃子衡說當初報9科只是想買多個保障，「當然話無諗過（成為狀元）就假嘅，但我覺得就非常需要運氣」。他說計劃報讀醫科，想做醫生是希望能幫助別人，「孫中山都係做醫生，最緊要係心態，做醫生最緊要係有醫德、仁心」。他未決定會選港大還是中大醫學院，「兩邊都有兩邊好」，會在未來幾天考慮。
「我嘅人生就係音樂，無咗音樂係唔得嘅」。這位矢志行醫的超級狀元，除選修3科理科，還有1科是音樂。鋼琴和大提琴均考獲演奏級的黃子衡，最喜歡的卻是合唱音樂，「人聲最真，無樂器機械發聲，係最真情流露嘅」。至於為何選讀醫科而非音樂系，黃則說讀音樂系便難以在醫學方面發展，但讀醫不會影響他對音樂的熱誠，相信這樣選擇「對我人生會最開心」。
談到對社會議題的看法，「超級狀元」對答四平八穩。問到一地兩檢，他說「香港係一個非常守法嘅地方，中國大陸都係一個守法嘅國家，我覺得暫時唔需要太多疑慮」。至於《國歌法》，他說「對國歌嘅尊重其實好基本，𠵱家限制公共場所，我覺得範圍係合理，如果無干涉私人場合係可以接受」。問到旺角衝突判刑，他說「我覺得暴力絕對係唔應該鼓吹，阻嚇作用係需要，不過刑期方面我就唔可以確實評論」。他又指特首林鄭月娥在房屋方面推出很多政策，形容她「有心」。
■記者鄧力行