曼城官方網站前日宣佈，成功喺英超球會李斯特城陣中，簽下心儀已久嘅阿爾及利亞翼鋒馬列斯，雙方簽下五年合約，而馬列斯將會着26號波衫。據英國《BBC》報道，呢宗交易嘅轉會費一如早前所料嘅6,000萬鎊（約6.25億港元），打破守將拿樸迪以5,700萬鎊加盟曼城嘅舊紀錄。馬列斯仲話好高興能夠加入曼城，「喺領隊哥迪奧拿帶領下曼城踢得非常出色，睇曼城嘅比賽係一種樂趣，佢哋重新定義英國足球比賽，所以我好高興能成為其中一分子。」仲話相信球會可以喺未來幾年取得成功，自己可以喺哥帥嘅麾下得到發揮。
事實上，馬列斯自2014年一月加盟李斯特城後，不但協助該隊升班，更係李城2015/16年球季神奇封王嘅功臣；其後兩年間每個轉會窗，都不斷盛傳馬列斯即將轉會，今年一月，馬列斯更因轉投曼城失敗後一度罷操，𠵱家馬列斯「嘈足兩年」，終能如願轉投曼城。
另外，阿仙奴宣佈從森多利亞簽下啱啱踢完世盃嘅烏拉圭22歲中場盧卡斯托拉拿（圖），雖然未有透露轉會費，但據英媒稱轉會費達2,200萬鎊（約2.3億港元），佢會着上「新10號仔」奧斯爾之前嘅11號波衫。周三亦宣佈簽下第五位新兵，從法乙羅連安特簽入19歲法籍中場古安杜斯。