Motorola新推出中階手機moto g6 plus，配備5.9吋18:9屏幕、2.2GHz八核心處理器，加上內置3,200mAh電池，以定價$2,699來說，都算得上合理。規格還規格，實際又好唔好用？
記者試了moto g6 plus約一星期，覺得手機外觀設計確實唔錯，手感幾好，唔易跣手。但弊在機背雙鏡頭凸出，放在褲袋會有些微頂住頂住的感覺，而且又驚使用時撞爛主鏡頭部份。規格上寫上moto g6 plus用上f/1.7大光圈鏡頭，實拍功能不弱，所拍影像有相當有層次，不過缺點是沒有光學變焦。特別拍攝功能有臉部濾鏡功能，在人頭上加入多種預設配飾，可用在自拍、拍攝及影片上，還算好玩。另外有4種速度選擇的縮時攝影，都可免除後製時的麻煩。「去背」功能能在拍攝時褪地，效果雖唔算完美，但記者覺得收貨。
moto系列手機好玩的地方是本身預設手勢操作，如搖動moto g6 plus兩次（要稍為用力）即可開啟閃光燈，扭一扭手腕就能快速開啟拍攝程式，睇落好似唔算特別，但如果一隻手拎住重物，就會明白這功能又幾好用。除這兩個預設智慧手勢外，記者都會再開啟用3隻指尖長按畫面即可擷取畫面的設定，因moto g6 plus的音量鍵跟開關都放在右邊，靠按鍵去擷取畫面確實唔方便。
moto g6 plus電池續航力唔錯，又設有快充功能，對得住定價。當然現時開價二千多的中階手機都有唔少選擇，若追求操作簡單方便，都可以考慮一下這款新出中階手機。
moto g6 plus規格
屏幕：5.9吋18:9屏幕
處理器：Snapdragon 630
記憶體/儲存：4GB+64GB
鏡頭：（主鏡頭）1,200萬+500萬像素、（自拍）1,600萬像素
電池：3,200mAh
體積：161 x 75.5 x 8.0mm
重量：168g
售價：$2,699
記者：布偉倫
攝影：周芝瑩
即Like全新飲食專頁【籽想好食】： https://www.facebook.com/food.appleseed/