立法會唞暑前夕，主席梁君彥仲有一劫，今日會面對民主派由衞生服務界議員李國麟代提、無約束力嘅不信任動議。過去立法會開會時，經常被梁君彥針對嘅白鴿黨議員尹兆堅，噚日下晝率先將今日用嚟招呼梁君彥嘅「大禮」攞入會議廳，就係一個巨型黑哨同紅牌，認真厚禮噃！
阿尹同八方講，梁君彥過去不斷吹黑哨、不斷濫權趕人出場，所以今次輪到民主派向爛主席說不，要向梁君彥送上呢份「大禮」，之後佢仲將呢份「大禮」放喺會議廳自己個座位前。主持緊會議嘅梁君彥，明顯對呢份厚禮唔多受落，仲喺許智峯發言後，叫許智𥧌要同當時不在席嘅阿尹講聲，叫佢收埋個巨型黑哨喎。
至於許智峯，當然冇理到佢呢位稱為「梁議員」而非「梁主席」嘅梁君彥，梁君彥其後則離開會議廳，改由內會主席李慧琼代主持會議，而個黑哨同紅牌就繼續留喺會議廳。