小米（1810）在上市首天收市後，便獲恒指公司納入綜合指數，引來很大迴響，當然這跟小米負評如潮有關，但心水清的投資者，應該留意到恒指公司在5月7日已公佈檢討綜合指數納入基準的諮詢總結，當時已經寫到明為同股不同權開綠燈，而恒指公司一向都有快速納入機制，去年眾安（6060）都在上市一個半月被迅速納入。
見到有戰友話，遲啲強積金焗買一定輸死了，不過，恒生綜合指數不同恒指，跟綜合指數的強積金肯定少之又少，而恒指公司在5月都提過，是否入恒指、國指，日後會再研究，暫時未有時間表，並不會在2018年落實，咁大家可以放心啦。
恒指公司在5月時修改恒生綜合指數的準則，在下月的季度檢討中，應該會有些新力軍受惠。根據改動，外國公司、合訂證券及同股不同權的公司將被納入，一直以來，這個綜合指數，都是港股通標的主要參考根據，在本港上市的外國公司唔多，但其實不少都係大市值股份，Prada（1913）、俄鋁（486）及新秀麗（1910）等等，都係熱門人選，而合訂證券，青冰即時會想起港燈SS（2638）。
今時不同往日，在北水減少流入的情況下，港股通新貴都唔一定狂升，回顧返半年前青冰一些心水股，雖然入了「標的」，但最後北水都無乜興趣，成唔到大事，而北水反而持續地買進教育股及醫藥股。以上幾間熱門外國公司，品牌就響噹噹，最後是否受大媽愛護，到時便知，反而俄鋁跌到咁殘，萬一入選，愛抄底的大媽肯定不少。
而港燈雖然係跌市避風塘，但睇返北水持有電能（006）、煤氣（003）及中電（002）的數目，係極之偏低，證明佢哋係着重炒味多於穩陣，要收息佢哋寧願揀匯控（005）及一眾內銀，同我們港燦睇法不同，估唔到投資取向，都突顯了中港矛盾。
青冰
http://fb.com/chingbing888
本欄逢周四刊出