「攻啊攻，快搶攻！」世界盃已經進入決賽階段，唔少球迷晚晚都捱更抵夜，支持愛隊，但好似呢位司機大佬咁，開工都心繫足球掛住打機就真係離譜，簡直攞乘客條命較飛！
喺金鐘返工嘅讀者黎小姐，前日黃昏7點左右，好似平時咁乘搭村巴返元朗，上車之後坐咗喺左邊第一排嘅位置，一路玩住電話嘅佢，去到屯門公路準備休息一下，呢個時候，竟然見到司機打緊機！「係玩緊足球小將，我連佢用乜嘢陣式都睇得好清楚」。從黎小姐提供嘅短片見到，司機將部手機夾咗喺右手邊，架車一路行，右手手指就一路輕撥屏幕，「如果佢係同行家聯絡緊都算，打機喎！」由於正值放工時間，架村巴載滿晒人，而黎小姐坐喺頭排，村巴亦冇安全帶，發生意外嘅話，分分鐘成個人飛出車外。「屯門公路係高速嚟，成日都有交通意外，佢簡直離晒譜」。
狡辯只係開着屏幕
黎小姐話，自己搭咗呢架村巴約一年，呢架車由灣仔往元朗，車費22蚊，全程只需大約半個鐘，搭西鐵至少都要45分鐘，所以都好受元朗居民歡迎㗎，而佢間中都會搭呢個司機嘅車，「平時我坐得比較後，睇唔到佢做乜嘢」。黎小姐認為巴士公司應該訓示司機，唔可以攞乘客條命開玩笑。
小記最初向有關村巴公司查詢時，職員引述肇事司機指佢只係開着咗屏幕冇打機，但小記提供片段後，司機先承認喺行車期間打機，村巴公司同司機都對事件向乘客致歉，又話司機承諾下不為例，而呢位司機入職大約八年，平時主要做站長，間中亦會駕駛，過去未收過有關投訴。
